ភ្នំពេញ៖ ឯកអគ្គរដ្ឋទូតហ្វីលីពីនប្រចាំនៅកម្ពុជាលោកស្រី Amelita Aquino បានស្នើដល់រាជរដ្ឋាភិបាលកម្ពុជាបន្តកិច្ចសហប្រតិបត្តិការជួយដល់វិស័យមីននៅប្រទេសភីលីពីន ជាពិសេសក្នុងតំបន់ស្វយ័ត Bangsamoro ដែលទើបបញ្ចប់សង្គ្រាម និងសំបូរដោយគ្រាប់មីន និងសំណល់ជាតិផ្ទុះពីសង្គ្រាម។

ការស្នើនេះធ្វើឡើងក្នុងពេលដែលលោកស្រី Amelita Aquino និងគណៈប្រតិភូសកម្មភាពមីនប្រទេសហ្វីលីពីន ដឹកនាំដោយសមាជិករដ្ឋសភានៃតំបន់ស្វយ័ត Bangsamoro (Muslim Mindanao)លោក Hussein Munoz ជួបជាមួយអនុប្រធានទី១ អាជ្ញាធរមីន លោកទេសរដ្ឋមន្ត្រី លី ធុជ កាលពីថ្ងៃទី៧ ខែមេសា ឆ្នាំ២០២២។

អស់រយៈពេល ៣០ឆ្នាំមកហើយដែលកម្ពុជាបានធ្វើសកម្មភាពក្នុងវិស័យសកម្មភាពមីន ដែលភាពជោគជ័យទាំងនេះបានមកពីការយកចិត្តទុកដាក់ និងការចូលរួមគាំទ្រពីដៃគូរអភិវឌ្ឍន៍ និងប្រទេសជាមិត្ត ដែលបានរួបរួមគ្នាដោះស្រាយក្នុងការផ្តល់ដីមានសុវត្ថិភាព និងការកាត់បន្ថយគ្រោះថ្នាក់ដោយសារមីន/គ្រាប់ ជាមួយនឹងការដាក់ចេញនូវចក្ខុវិស័យដឹកនាំ និងរចនាសម្ព័ន្ធគ្រប់គ្រងរឹងមាំទាំងថ្នាក់ជាតិ និងថ្នាក់ជាតិរបស់រដ្ឋាភិបាល ដែលមានអាជ្ញាធរមីនជាសេនាធិការ។

អនុប្រធានទី១ នៃអជ្ញាធរមីនកម្ពុជា លោកទេសរដ្ឋមន្ត្រី លី ធុជ មានប្រសាសន៍ថា ៣០ឆ្នាំមកនេះកម្ពុជាបានទទួលនូវមេរៀនគ្រប់បែបយ៉ាង និងបទពិសោធន៍យ៉ាងច្រើន ព្រមទាំងមានមហិច្ឆតាចូលរួមចែករំលែកជួយទៅដល់ប្រជាជន និងបណ្តាប្រទេសទាំងក្នុងតំបន់ និងពិភពលោក ដែលត្រូវការចាំបាច់នូវការងារបោសសម្អាតមីនផងដែរ។

កោះមីនដាណាវ នៃប្រទេសភីលីពីនមានប្រវត្តិសាស្ត្ររយៈពេល ៤សតវត្សនៃការតស៊ូរបស់ម៉ូរ៉ូប្រឆាំងនឹងកងកម្លាំងរដ្ឋាភិបាលហ្វីលីពីនតាំងពីចុងទសវត្សរ៍ឆ្នាំ១៩៦០។ ក្នុងឆ្នាំ២០១៤ ក្រុមរដ្ឋឥស្លាមចាប់ផ្ដើមមានឥទ្ធិពលនៅលើកោះនេះ ហើយនៅឆ្នាំ២០១៧ ក្រុមរដ្ឋឥស្លាមចាប់ផ្ដើមព័ទ្ធទីក្រុង Marawi ក្នុងខេត្ត Lanao Del Sur បានបង្កការប្រយុទ្ធរយៈពេលប្រាំខែជាមួយយោធាហ្វីលីពីន។

ក្នុងខែមីនា ឆ្នាំ២០១៩ រដ្ឋាភិបាលភីលីពីនបានបង្កើតតំបន់ស្វយ័ត Bangsamoro ក្នុង Muslim Mindanao (BARMM) គឺជាជំហានដ៏សំខាន់មួយឆ្ពោះទៅរកដំណោះស្រាយជម្លោះរវាងរដ្ឋាភិបាលហ្វីលីពីន និងក្រុមស្វែងរកស្វ័យភាពជាច្រើនក្នុងតំបន់ដែលស្វែងរកស្ថិរភាព និងសន្ដិភាពឡើងវិញ ខណៈសំណល់សង្គ្រាមនៅមិនទាន់បោសសម្អាតអស់នៅឡើយទេ៕